Ýazlar joşsa jahanda,
Seni göresim gelýär.
Gökde şapak batanda,
Seni göresim gelýär.

Jepa bormy munça-da,
Keşbiň gülde-gunçada.
Göwnüm sähel ynjasa,
Seni göresim gelýär.

Çykyp düzgün-kadadan,
Gitsedim bu adadan.
Öz-özümden ýadasam,
Seni göresim gelýär.

Ýollar, heý, öwrüm-öwrüm,
Çykmyş ýoluňa ömrüm.
Ýüregmi göze öwrüp,
Seni göresim gelýär.

Gijeler daňa gurban,
Hoş sözler heňe gurban,
Gül ömrüm saňa gurban,
Seni göresim gelýär.

Kakamyrat Rejepow